ரஷ்ய ஜனாதிபதி விளாடிமிர் புடின், உக்ரைனுடனான அமைதிப் பேச்சுவார்த்தைகளில் ஆக்கிரமிக்கப்பட்ட எந்தப் பிரதேசத்தையும் விட்டுக்கொடுக்கப் போவதில்லை என்று மீண்டும் திட்டவட்டமாகத் தெரிவித்துள்ளார். இந்தப் பேச்சுவார்த்தைகள் "குறிப்பிட்ட பிரதேசங்களில் வாழும் மக்களின் விருப்பத்தை" அங்கீகரிக்க வேண்டும் என்று அவர் ஸ்கை நியூஸ் அராபியாவிற்கு அளித்த பேட்டியில் வலியுறுத்தினார். இது 2022 இல் உக்ரைனின் நான்கு இணைக்கப்பட்ட பகுதிகளிலும், கிரிமியாவிலும் ரஷ்யா நடத்திய வாக்கெடுப்புகளைக் குறிக்கிறது. இந்த வாக்கெடுப்புகளை மேற்கத்திய நாடுகள் "போலி" என்று விமர்சித்தாலும், புடின் இதை "மக்களின் விருப்பம்" மற்றும் "ஜனநாயகம்" என்று குறிப்பிடுகிறார்.

உக்ரைனின் தலைமை "அதன் ஆதரவாளர்களின்" நலன்களுக்குப் பதிலாக "தேசிய நலன்களால்" பேச்சுவார்த்தைகளில் வழிநடத்தப்பட வேண்டும் என்று புடின் தெரிவித்தார். இந்த ஆதரவாளர்கள் மோதலை முடிப்பதில் ஆர்வமாக இல்லை என்றும், மாறாக உக்ரைனை தங்கள் சுயநல அரசியல் நோக்கங்களுக்காகப் பயன்படுத்துவதாகவும் அவர் குற்றம் சாட்டினார்.

மேலும், செயின்ட் பீட்டர்ஸ்பர்க்கில் நடந்த ஒரு வர்த்தக தலைவர்கள் கூட்டத்தில், "ரஷ்ய மற்றும் உக்ரைனிய மக்களை ஒரு நாடாகவே நான் கருதுகிறேன். இந்த அர்த்தத்தில், முழு உக்ரைனும் எங்களுடையது" என்று தெரிவித்தக புடின் குறிப்பிட்டார்.

முக்கியமாக, பல மாதங்களுக்குப் பிறகு முதன்முறையாக, உக்ரைனுக்கு அணுசக்தி அச்சுறுத்தலையும் புடின் விடுத்துள்ளார். உக்ரைன் ரஷ்யப் படைகளுக்கு எதிராக "டர்ட்டி பாம்" பயன்படுத்தினால் "பேரழிவு" விளைவுகள் ஏற்படும் என்று அவர் எச்சரித்தார். இது "நியோ-நாஜிக்கள்" என்று அவர் குறிப்பிடுபவர்களின் "கடைசி தவறு" ஆக இருக்கும் என்றும், ரஷ்யாவின் பதில் "மிகவும் கடுமையாக" இருக்கும் என்றும் அவர் தெரிவித்தார். 

"உக்ரைன் ரஷ்ய கூட்டமைப்புடன் மோதலில் ஈடுபட விரும்பும் தரப்பினரின் புவிசார் அரசியல் போராட்டத்தில் ஒரு கருவியாக இருப்பதை விட ஒரு சிறந்த விதியைப் பெறத் தகுதியானது" என்றும் அவர் கூறினார்.

கள நிலவரங்களும் உக்ரைனின் எதிர்வினையும்

சமீபத்திய கள நிலவரப்படி, சனிக்கிழமை காலை, ரஷ்யா உக்ரைனின் டொனெட்ஸ்க் பிராந்தியத்தில் உள்ள சபோரிஜியா என்ற ஒரு சிறிய கிராமத்தைக் கைப்பற்றியதாகக் கூறியது. 

அதேசமயம், சபோரிஜியா பிராந்திய இராணுவ நிர்வாகத்தின் தலைவர் இவான் ஃபெடோரோவ், வெள்ளிக்கிழமை 200க்கும் மேற்பட்ட ரஷ்ய UAVகள் அப்பகுதியைத் தாக்கியதாகத் தெரிவித்துள்ளார்.

உக்ரைன் ஜனாதிபதி வோலோடிமிர் செலென்ஸ்கி, டென்மார்க், நோர்வே, ஜெர்மனி, கனடா, இங்கிலாந்து மற்றும் லிதுவேனியாவுடன் இணைந்து கூட்டு ஆயுத உற்பத்தியைத் தொடங்க பேச்சுவார்த்தை நடத்தி வருவதாகக் கூறியுள்ளார். உக்ரைனின் ஆயுத உற்பத்திக்காக தங்கள் மொத்த உள்நாட்டு உற்பத்தியில் (GDP) 0.25% ஐ வழங்கக் கூட்டாளர்களை அவர் வலியுறுத்தினார்.