பிரபல ஆசிரியை ஹயேஷிகா பெர்னாண்டோ, 'டீச்சர் அம்மா' என அறியப்படுபவரால் தாக்கப்பட்டதாகக் கூறப்படும் ஒரு இளைஞர், தனது அடிப்படை உரிமைகள் மீறப்பட்டுள்ளதாகக் கோரி உயர் நீதிமன்றத்தில் மனு தாக்கல் செய்துள்ளார். ஆசிரியை அளித்த புகாரைத் தொடர்ந்து கந்தானை பொலிஸாரால் தான் கைது செய்யப்பட்டதன் மூலம் தனது அடிப்படை மனித உரிமைகள் மீறப்பட்டதாக அந்த இளைஞர் மனுவில் குறிப்பிட்டுள்ளார்.
மனுதாரர், ஹயேஷிகா பெர்னாண்டோவுக்குச் சொந்தமான தனியார் கல்வி நிறுவனத்தில் தொழில்நுட்ப அதிகாரியாகப் பணிபுரிந்து வந்துள்ளார். அவர் ஒரு இளம் பெண்ணுக்கு கணினிப் பயிற்சி அளித்துக்கொண்டிருந்தபோது, மே 6 அன்று ஹயேஷிகா பெர்னாண்டோ அங்கு வந்து, பேஸ்புக்கில் பதிவிட்ட ஒரு கருத்து குறித்து விசாரித்து, தன்னை உதைத்ததாகக் கூறியுள்ளார். பின்னர், மற்றொரு குழுவினரால் தான் கடுமையாக தாக்கப்பட்டதாகவும் மனுதாரர் குற்றம் சாட்டியுள்ளார்.
இதைத் தொடர்ந்து, சம்பந்தப்பட்ட யுவதியின் பெற்றோர் அழைக்கப்பட்டு, தன்னைப் பாலியல் வன்கொடுமை செய்ததாக பொய்யாகக் குற்றம் சாட்டப்பட்டதாகவும் மனுதாரர் தெரிவித்துள்ளார்.
மே 14 அன்று, தாக்குதல் காரணமாக மருத்துவமனையில் அனுமதிக்கப்பட்டிருந்தபோது, நிறுவன உரிமையாளரின் புகாரின் பேரில், கந்தானை பொலிஸாரால் தான் கைது செய்யப்பட்டதாகவும் மனுதாரர் கூறியுள்ளார். மேலும், பொலிஸ் அதிகாரிகள் தன்னை 48 மணி நேரத்திற்குள் நீதிமன்றத்தில் ஆஜர்படுத்தவில்லை எனவும் அவர் குற்றம் சாட்டியுள்ளார்.
இந்த மனு, நீதிபதிகள் அச்சலா வெங்கப்புலி மற்றும் சம்பத் விஜேரத்ன ஆகியோர் அடங்கிய உயர் நீதிமன்ற நீதிபதிகள் அமர்வு முன் விசாரணைக்கு வந்தது. கந்தானை பொலிஸ் பரிசோதகர் மற்றும் ஒரு குழுவினர் இந்த மனுவில் பிரதிவாதிகளாகப் பெயரிடப்பட்டுள்ளனர்.
தன்னை நியாயமான காரணமின்றி கைது செய்து, சட்டவிரோதமாக தடுத்து வைத்ததன் மூலம் தனது அடிப்படை மனித உரிமைகள் மீறப்பட்டுள்ளதாகவும், நீதிமன்றம் பொருத்தமானதாகக் கருதும் இழப்பீட்டுத் தொகையை பெற்றுத் தருமாறும் மனுதாரர் உயர் நீதிமன்றத்தை கோரியுள்ளார்.
0 Comments
No Comments Here ..