119 அவசர இலக்கத்தைத் தவறாகப் பயன்படுத்த வேண்டாம்: காவல்துறை வேண்டுகோள்
காவல்துறை அவசர இலக்கமான 119ஐ பொதுமக்கள் தவறாகப் பயன்படுத்துவதைத் தவிர்க்குமாறு வேண்டுகோள் விடுத்துள்ளது. காவல்துறை ஊடகப் பேச்சாளர் அலுவலகம் வெளியிட்டுள்ள அறிக்கையில், 119 அவசர அழைப்பு மையம் தவறாகப் பயன்படுத்தப்பட்ட சம்பவங்கள் கண்டறியப்பட்டுள்ளதாகத் தெரிவிக்கப்பட்டுள்ளது.
அவசரத் தேவைகளுக்கான உண்மையான முறைப்பாடுகளுக்கு மேலதிகமாக, போலியான முறைப்பாடுகள் மற்றும் பிற அவசர சேவைகளுக்குப் பரிந்துரைக்கப்பட வேண்டிய முறைப்பாடுகளும் 119 இலக்கத்தின் மூலம் பெறப்படுகின்றன. உதாரணமாக, கையூட்டு, காணிப் பிரச்சினைகள், நிதித் தகராறுகள் போன்ற வழக்குகள் தொடர்பான முறைப்பாடுகளும் இந்த அவசர அழைப்பு மையத்திற்குக் கிடைப்பதாக காவல்துறை குறிப்பிட்டுள்ளது. இந்த வகையான பிரச்சினைகளை பிற சேவைகள் மூலம் தீர்க்க முடியும் என்பது குறிப்பிடத்தக்கது.
இத்தகைய தவறான பயன்பாடு காரணமாக, உண்மையான அவசர தேவைகளின்போது 119 அவசர அழைப்பு மையத்தைத் தொடர்புகொள்ளும் திறன் வெகுவாகக் குறைவதாக சுட்டிக்காட்டப்பட்டுள்ளது.
உண்மைக்குப் புறம்பான முறைப்பாடுகளை முன்வைக்கும் நபர்கள் குறித்து நீதிமன்றத்திற்குத் தெரிவிக்கவும், அவர்களுக்கு எதிராகச் சட்ட நடவடிக்கை எடுக்கவும் காவல்துறை நடவடிக்கை எடுத்துள்ளது. எனவே, பொதுமக்கள் 119 அவசர இலக்கத்தை பொறுப்புடன் பயன்படுத்துமாறு கேட்டுக்கொள்ளப்படுகிறார்கள்.
0 Comments
No Comments Here ..