பஹல்காம் தாக்குதல் மற்றும் அதைத் தொடர்ந்த இந்தியா - பாகிஸ்தான் எல்லை மோதல்களுக்குப் பிறகு, அமெரிக்க அதிபர் டொனால்டு டிரம்ப் ஆற்றிய "தீர்க்கமான இராஜதந்திர தலையீடு" காரணமாக போர் தவிர்க்கப்பட்டதாகப் பாராட்டிய பாகிஸ்தான், அவருக்கு நோபல் அமைதிப் பரிசு வழங்கப்பட வேண்டும் எனப் பரிந்துரை செய்திருந்தது. 

ஆனால், சமீபத்திய இஸ்ரேல்-ஈரான் மோதலில் அமெரிக்காவின் நிலைப்பாடு தொடர்பாக பாகிஸ்தான் வெளிப்படையாக அமெரிக்காவைக் கண்டித்ததைத் தொடர்ந்து, டிரம்ப் மீதான நோபல் பரிசு பரிந்துரையை மறுபரிசீலனை செய்ய வேண்டும் என பாகிஸ்தான் அரசியல் கட்சித் தலைவர்கள் தங்கள் அரசாங்கத்தைக் கேட்டுக்கொண்டுள்ளனர்.

பஹல்காம் பயங்கரவாதத் தாக்குதலுக்குப் பதிலடியாக இந்தியா, பாகிஸ்தானில் உள்ள பயங்கரவாத முகாம்கள் மீது தாக்குதல் நடத்தியது. இதனால் பாகிஸ்தான் இந்திய எல்லையில் அத்துமீறி டிரோன் தாக்குதல்களை நடத்தியது. இதற்கு இந்தியாவும் பதிலடி கொடுத்ததால், இரு நாடுகளுக்கும் இடையே போர் ஏற்படும் அபாயம் ஏற்பட்டது. அந்த நேரத்தில், அமெரிக்க அதிபரா டிரம்ப், இந்தியா மற்றும் பாகிஸ்தான் போர் நிறுத்தத்திற்கு ஒப்புக் கொண்டுள்ளதாக அறிவித்தார். டிரம்ப்பின் இந்த "தீர்க்கமான இராஜதந்திர தலையீடு மற்றும் முக்கிய தலைமை" காரணமாகவே அமைதி ஏற்பட்டதாகப் பாராட்டிய பாகிஸ்தான், அவருக்கு அமைதிக்கான நோபல் பரிசு வழங்கப்பட வேண்டும் என நோபல் பரிசு வழங்கும் குழுவுக்கு பரிந்துரை கடிதம் எழுதியிருந்தது.

 அந்தக் கடிதத்தில் பாகிஸ்தான் துணைப் பிரதமர் மற்றும் வெளியுறவுத்துறை அமைச்சர் இஷாக் தார் கையெழுத்திட்டிருந்தார்.

இதற்கிடையே, இஸ்ரேல்-ஈரான் இடையிலான சண்டையில் ஈரான் அணுஉலை நிலையங்கள் மீது அமெரிக்கா தாக்குதல் நடத்தியது. இதற்கு பாகிஸ்தான் அரசு வெளிப்படையாக அமெரிக்காவுக்கு கண்டனம் தெரிவித்திருந்தது. 

இந்தச் சூழ்நிலையில், பாகிஸ்தான் அரசியல் கட்சித் தலைவர்கள், டொனால்டு டிரம்புக்கு அமைதிக்கான நோபல் பரிசு வழங்கப்பட வேண்டும் என்ற பரிந்துரையை அரசு மறுபரிசீலனை செய்ய வேண்டும் என்று கோரிக்கை விடுத்துள்ளனர்.

நோபல் பரிசு குறித்து டிரம்ப்பிடம் கேட்கப்பட்டபோது, "இந்தியா மற்றும் பாகிஸ்தான் விவகாரத்தில் தனது பணி, மற்றும் காங்கோ ஜனநாயகக் குடியரசுக்கும் ருவாண்டாவுக்கும் இடையிலான பகைமைகளை முடிவுக்குக் கொண்டுவரும் ஒரு ஒப்பந்தத்தை திங்கட்கிழமை கையெழுத்திட ஏற்பாடு செய்தது உட்பட பல காரணங்களுக்காக தனக்கு அது வழங்கப்பட வேண்டும். நான் நான்கு அல்லது ஐந்து முறை அதைப் பெற்றிருக்க வேண்டும். அவர்கள் எனக்கு நோபல் அமைதிப் பரிசு கொடுக்க மாட்டார்கள், ஏனென்றால் அவர்கள் அதை தாராளவாதிகளுக்கு மட்டுமே கொடுக்கிறார்கள்" என்று கூறியிருந்தார்.

இந்த அரசியல் சூழல், சர்வதேச இராஜதந்திர உறவுகளின் சிக்கலான தன்மையையும், உள்நாட்டு அழுத்தங்கள் எவ்வாறு வெளியுறவுக் கொள்கை முடிவுகளில் தாக்கத்தை ஏற்படுத்தலாம் என்பதையும் எடுத்துக்காட்டுகிறது.