31,Aug 2025 (Sun)
  
CH

வவுனியா பிரதான வீதி புனரமைப்பு கோரி போராட்டம்: நாடாளுமன்ற உறுப்பினர் உறுதி!

வவுனியா, மினாநகர் பிரதான வீதியானது நெளுக்குளம் நேரியகுளம் வீதியில் சந்திக்கும் சந்தியில் இன்று கவனயீர்ப்புப் போராட்டம் ஒன்று நடைபெற்றது. கடந்த 12 ஆண்டுகளாகப் புனரமைக்கப்படாமல் உள்ள தமது கிராமத்தின் பிரதான வீதியை உடனடியாகச் செப்பனிடுமாறு கோரி மினாநகர் மக்கள் இந்தப் போராட்டத்தில் ஈடுபட்டனர்.


2013 ஆம் ஆண்டு குடியேற்றம் செய்யப்பட்ட சூடுவெந்தபுலவு, மினாநகர் கிராமத்தின் பிரதான வீதி, தினசரி கல்குவாரி டிப்பர் வாகனங்கள் செல்வதால் மோசமாகச் சேதமடைந்து ஆபத்தான நிலையில் காணப்படுவதாகப் போராட்டத்தில் ஈடுபட்டவர்கள் தெரிவித்தனர்.


சுமார் 200 இற்கும் அதிகமான குடும்பங்கள் வசிக்கும் இந்தக் கிராமத்தில், தினமும் 50 இற்கும் மேற்பட்ட பாடசாலை மாணவர்கள், நோயாளிகள் உட்படப் பலர் இந்த வீதியைப் பயன்படுத்தி வருகின்றனர். அண்மையில் ஒரு மாணவன் மோசமான விபத்துக்குள்ளான சம்பவத்தையும் அவர்கள் சுட்டிக்காட்டினர்.


ஆகவே, வீதி தொடர்பான தெளிவை ஏற்படுத்தி, வீதியைச் சிறப்பான முறையில் அமைத்துத் தருமாறும், கல்குவாரி கனரக வாகனங்களுக்கு வேறு பாதை அமைத்துத் தருமாறும் மக்கள் கோரிக்கை விடுத்தனர்.


கவனயீர்ப்புப் போராட்டம் இடம்பெற்ற பகுதிக்கு வருகை தந்த ஐக்கிய மக்கள் சக்தியின் வன்னி மாவட்ட நாடாளுமன்ற உறுப்பினர் முத்து முகமது, செட்டிகுளம் பிரதேச சபை தவிசாளர் இம்தியாஸ் மற்றும் உள்ளூராட்சி சபை உறுப்பினர்கள் ஆகியோர் மக்களது கோரிக்கைகளைக் கேட்டறிந்தனர். 


செட்டிகுளம் பிரதேச சபை ஊடாகக் குறித்த வீதியைப் புனரமைத்துத் தருவதாகவும், கல்குவாரி தொடர்பில் கவனம் செலுத்துவதாகவும் உறுதியளிக்கப்பட்டதைத் தொடர்ந்து மக்கள் போராட்டத்தைக் கைவிட்டுச் சென்றனர்.




வவுனியா பிரதான வீதி புனரமைப்பு கோரி போராட்டம்: நாடாளுமன்ற உறுப்பினர் உறுதி!

0 Comments

    No Comments Here ..

Leave a comment

Post Comment





<

செய்திமடல்

ராசிப்பலன்கள்

கருத்துகணிப்பு