இஸ்ரேலின் வெய்ஸ்மேன் அறிவியல் நிறுவனம் மீது ஈரானின் ஏவுகணைத் தாக்குதல்

இஸ்ரேலின் முக்கிய அறிவியல் மற்றும் தொழில்நுட்ப ஆராய்ச்சி மையமான வெய்ஸ்மேன் அறிவியல் நிறுவனம் மீது ஈரான் நேற்று (ஜூன் 20, 2025) ஏவுகணைத் தாக்குதல் நடத்தியது. இந்தத் தாக்குதலால் அதிநவீன ஆய்வகக் கட்டிடங்கள் பலத்த சேதமடைந்தன. அதிர்ஷ்டவசமாக, யாரும் கொல்லப்படவோ அல்லது காயமடையவோ இல்லை என்றாலும், பல வருட ஆராய்ச்சிகள் வீணாக்கப்பட்டுள்ளதாகக் கூறப்படுகிறது.

ஈரான், தனது அணு விஞ்ஞானிகளைக் கொன்றதற்குப் பழிவாங்கும் விதமாகவே இந்தத் தாக்குதலை நடத்தியுள்ளதாகத் தெரிவித்துள்ளது. இது இஸ்ரேலுக்கு "பெரும் அடியைக்" கொடுத்ததாகவும், போரின் ஆரம்ப நாட்களில் இஸ்ரேலின் பெருமையை உடைத்து, ஈரான் தார்மீக வெற்றியைப் பெற்றதாகவும் கூறப்படுகிறது. வெய்ஸ்மேன் நிறுவனத்தின் மூலக்கூறு செல் உயிரியல் துறையின் பேராசிரியர் ஓரன் ஷால்டின் கூட, இஸ்ரேலின் "அறிவியல் மகுடத்தின் மதிப்பை" குறைப்பதில் ஈரான் தார்மீக வெற்றி பெற்றதாகக் குறிப்பிட்டுள்ளார்.

இஸ்ரேலின் "தொழில்நுட்ப மூளை" என்று அழைக்கப்படும் வெய்ஸ்மேன் நிறுவனம், உலகின் முன்னணி அறிவியல் ஆராய்ச்சி மையங்களில் ஒன்றாகும். கணிதம், இயற்பியல், வேதியியல், மரபியல் மற்றும் கணினி அறிவியல் உள்ளிட்ட பல்வேறு துறைகளில் 2,500 க்கும் மேற்பட்ட ஆராய்ச்சியாளர்கள் மற்றும் விஞ்ஞானிகள் இங்கு பணியாற்றினர். இந்த மையம் ஆயிரக்கணக்கான விஞ்ஞானிகளுக்குப் பயிற்சி அளித்துள்ளதுடன், 30 க்கும் மேற்பட்ட அதிநவீன ஆய்வகங்கள், விரிவான நூலகம் மற்றும் தங்குமிடம், படிப்பு வசதிகள் ஆகியவற்றைக் கொண்டுள்ளது.

இந்த நிறுவனம் இஸ்ரேலிய இராணுவத்திற்கான புதிய தொழில்நுட்பங்களையும், ஆயுதங்களையும் உருவாக்குவதில் குறிப்பிடத்தக்கப் பங்காற்றியுள்ளது. இஸ்ரேலிய பாதுகாப்புப் படைகளால் பயன்படுத்தப்படும் பல புதிய ஆயுதங்கள் மற்றும் உபகரணங்கள் இந்த நிறுவனத்தின் ஆராய்ச்சியாளர்களால் உருவாக்கப்பட்டவை. ட்ரோன் தொழில்நுட்பம், சைபர் பாதுகாப்பு, உயிரியல் ரீதியாக ஈர்க்கப்பட்ட பொருட்கள், போரில் செயற்கை நுண்ணறிவு, போரில் மறைகுறியாக்கப்பட்ட தகவல் தொடர்பு அமைப்புகள் மற்றும் புதுமையான ஆயுத அமைப்புகள் அனைத்தும் இங்கு உருவாக்கப்பட்டு வருகின்றன. மேலும், அணு ஆராய்ச்சியை ஆதரிக்கும் செயல்பாடுகளும் இங்கு நடத்தப்பட்டதாகக் கூறப்படுகிறது. பாதுகாப்பு உபகரண நிறுவனமான எல்பிட் சிஸ்டம்ஸ் நிறுவனத்திற்கு வெய்ஸ்மேன் நிறுவனத்தின் ஆதரவு குறிப்பிடத்தக்கது. இந்த நிறுவனத்தின் பட்டதாரிகளில் பலர் இஸ்ரேலின் ஆயுதத் துறையில் தலைமைப் பதவிகளை வகித்துள்ளனர்.