எதிர்கட்சித் தலைவர் சஜித் பிரேமதாச தலைமையிலான கூட்டணி, பொதுத்தேர்தலில் அன்னச் சின்னத்தில் களமிறங்க பெரும்பாலானோரின் ஆதரவு கிடைத்துள்ளதாக ஐக்கிய தேசியக் கட்சியின் நாடாளுமன்ற உறுப்பினர் முஜிபூர் ரஹ்மான் தெரிவித்தார்.
சிறிகொத்தவில் இடம்பெற்ற செய்தியாளர் சந்திப்பில் கலந்துகொண்டு உரையாற்றும்போதே அவர் இவ்வாறு குறிப்பிட்டார்.
அவர் அங்கு மேலும் தெரிவிக்கையில், “தற்போது, அத்தியாவசியப் பொருட்களின் விலை அதிகரிக்கப்பட்டுள்ளது.
நான்கு பேர் உள்ள குடும்பமொன்றில் ஒருவேளை சாப்பிடுவதே சவாலாக மாறியுள்ளது. மரக்கறிகளின் விலை எல்லாம் அதிகரித்துள்ளன.
இதற்கு அரசாங்கம் என்ன தீர்வினை முன்வைக்கப்போகிறது. அத்தோடு, எதிர்வரும் செவ்வாய்க்கிழமை ஐக்கிய தேசியக் கட்சியின் செயற்குழுக் கூட்டம் இடம்பெறவுள்ளது.
பிரச்சினைகள் அனைத்தும் தீர்க்கப்பட்டுக்கொண்டிருக்கின்றன.பெரும்பாலும் அன்னச் சின்னத்தின் கீழ் பொதுத் தேர்தலில் களமிறங்கவே தீர்மானிக்கப்பட்டுள்ளதாக நினைக்கிறேன்.
சஜித் பிரேமதாச தலைமையிலேயே களமிறங்குவோம். இவர்தான் எமது பிரதமர் வேட்பாளர் என்பதிலும் மாற்றமில்லை. இந்தநிலையில், அன்னச் சின்னத்தில் களமிறங்க பெரும்பாலானோர் ஆதரவு தெரிவித்துள்ளார்கள் என்றே தெரிகிறது” என மேலும் தெரிவித்தார்.
0 Comments
No Comments Here ..